Zorada word beskou as een van SA se voorste orrel-improvisators, veral vir haar innoverende klankbaan-improvisasies vir die stomfilms The Hunchback of Notre Dame, The Four Horsemen of the Apocalypse en The Phantom of the Opera. Sy is die eerste Suid-Afrikaner wat hierdie kunsvorm aandurf. KYKnet neem binnekort ‘n DVD op van The Phantom of the Opera.

Vir haar grensverskuiwende bydrae tot Klassieke musiek is sy tydens die KKNK 2006 met ‘n spesiale Kanna vereer.  In 2007 ontvang sy die MJ Thom toekenning vir uitmuntende onderwys van die FAK.

As orrelis tree Zorada landwyd op in uitvoerings van stomfilm-improvisasies, asook vrye improvisasies op kerkmusiek. Optredes met orkeste sluit in die Kaapse Filharmoniese orkes met Saint-Saens se Orrelsimfonie, en die Hugo Lambrechts Simfonie-orkes met ‘n Handel-concerto. Sy het ook konsertreise na België en Namibië onderneem.

Haar eerste CD met orrelimprovisasies op kerkliedere, In Hemelse Taal (Linguis Angelorum), verskyn in 1998, ook ‘n eerste van sy soort in Suid-Afrika.  Daarna volg nog twee CDs: Lingua Gratiae (Taal van Genade) en TWO (Trumpet With Organ). As begeleier op klavier en orrel het sy ‘n aandeel aan ‘n hele aantal CD’s. Haar derde CD met orrel-improvisasies, Lingua Sancta (In Heilige Taal), is in 2010 vrygestel.  As begeleier op klavier en orrel het sy ‘n aandeel aan ‘n hele aantal CD’s.

As pianis vorm sy saam met Elna van der Merwe die Blondes, ‘n klavierduo wat klassieke sowel as ligte musiek verwerk in tweeklavierkeurspele. Benewens optredes by die meeste kunstefeeste, korporatiewe en privaat funksies, tree hulle in 2009 op uitnodiging in Israel en Lesotho op. In 2011 tree hulle vir die eeste keer in Londen op.  In 2008 is hul eerste CD/DVD vrygestel met musiek van Bach, Mozart, ABBA en die Beatles. Hul tweede CD met musiek van Beethoven, Tchaikovsky en Queen, is in Mei 2010 vrygestel.

Optredes as beoordelaar sluit in die ATKV Muziq 2010, Sanlam Nasionale Musiekkompetisie 2010, Unisa Oorsese Musiekstudiebeurskompetisie 2007, die Beethoven- en Rachmaninoff-kompetisies (US Konservatorium), asook die kunswedstryde van Stellenbosch en die Overberg. Verder was sy vir twee jaar ‘n klavierpaneellid by die Internasionale Kamermusiekfees (US Konservatorium). Sy beoordeel gereeld koorkompetisies van die Onderwysdepartement, en was vir jare eksaminator vir Musiek in die Senior Sertifikaat-eksamen van die WKOD. Tans is sy nasionale eksaminator vir Nasionale Departement van Basiese Onderwys en moderator vir Umalusi.

Zorada was tot 2007 Departementshoof: Musiek aan die Hoër Meisieskool Bloemhof op Stellenbosch.  In 1995 het sy die Stellenbosch Nasionale Ensemble-Kompetisie gestig, en was vir 11 jaar die hooforganiseerder daarvan. Tans is sy ‘n vryskut-musikus.